仲記得7年前, 呢個小妹妹黎見工做當時嘅咖啡師, 成過程因為緊張, 全身好似舊式機械人咁緊哂, 隻眼勁大咁呆住望住我, 咩都講唔到, 咁諗住叫佢沖杯啡拉個花嘗試下, 點知一路沖一路拉隻手一路震, 結果可想而知, 最後我地請左佢。而呢7年佢成長左好多, 由樓面到自己進修咖啡去到真係沖到啡拉到靚花, 到慢慢識調下機, 又入埋廚房煮野備野清潔咩都做, 成班叔叔姐姐睇住佢大, 年幾兩年前佢話想轉做兼職, 因為想讀返書, 體育相關嘅野, 到今日畢業啦, 成件事就好似睇住自己個女畢業咁。睇住個妹豬由社恐變為開朗大妹, 令我地知道MANNA其實最感恩就係擁有時間, 有時間陪人行有時間見證人成長。
始終MANNA唔係主力做體育事工, 雖然有籃球事工但都係做行政野居多, 未必發揮得哂佢全部。而現在嘅佢, 係一個有餐飲經驗煮到野食嘅咖啡師, 同時可以係康體事工上有所發揮嘅妹子, 開朗而保有當初嘅純品, 我地誠意向各友好機構推薦呢個妹妹, 呢個係MANNA成長嘅阿女。如果睇到呢到你地咁岩有位置發揮到佢的話就聯絡我地, 如果唔係我地等多兩等, MANNA就會一如以往咁, 應該會係開展新事工係俾阿女發揮。
