呢位姐妹, 當日因為失業而黎到MANNA食飯, 認識多左之後做埋義工, 無幾耐就發現有左癌症, 所有野都要迫住停低。
佢抱住最正面嘅心經歷住上主同在去面對, 最後大約兩年左右好多野都好轉, 仲開始打算之後條路應該點行, 打返工? 幫人補習? 佢好感激中間經歷好多神蹟令佢走過呢兩年, 但近呢段時間, 佢另一半要同佢離婚, 晴天霹靂下, 再接住係一次檢查之下, 醫生發現癌症又返返黎, 仲去左好多唔同地方, 癌症可怕, 但更可怕係以為走左捱完啦, 又要再癌症同見面。 係一次社區大廳晚飯下, 佢同另一位同工輕輕咁講返目前情況, 講到佢自己經已無哂所有錢同存款, 但係又要盡快開始抽針等前期檢查等醫生可以盡快決定醫療方針, 令佢慢慢講到有點擔心同徬徨。MANNA的確係無任何癌症支援方法, 果位同工本身都唔係有錢人, 但係最後就自願自費為呢位姐妹支付果幾次前期費用。
11月啦, 就快會再一次開始化療, 姐妹調整好心情, 仍然相信上帝有最好安排, 如此嘅信心真係小見。係做化療之前, 一班同行同工陪佢食佢最喜歡嘅海鮮打邊爐, 廚師同工親自去買最新鮮嘅自己清洗埋, 滾埋個魚湯, 連墨丸都係自己手打, 因為怕出邊嘅唔清潔, 始終姐妹現時抵抗力唔太好。 今個晚上嘅MANNA, 有詩歌有笑聲有溫暖, 就好似預祝姐妹呢場仗嘅勝利
