“四樓有四仔, 四仔無格仔”, 相信好多同我咁上下年紀, 放學行街放工有經過旺角好景商場嘅朋友, 都一定有不斷聽到呢句野, 都知道邊個係好景阿叔, 佢都算係一代社區名人, 仲俾人訪問埋。過左咁多年之後, 佢最後都俾毒品擊敗到身體敗壞哂, 但係就因為咁而可以有資助住到護老院, 把聲都因為無再係咁講野而無咁沙啞。
而估唔到, 原來我地同工馬爺係後生時係識佢嘅, 所以我地因為佢仲開始埋探訪埋個護老院。馬爺都算係傳奇人物, 十幾歲食毒品食到六十幾歲, 刀佢揸過槍佢都揸過, 最後因為MANNA同工係街頭捉住佢, 日哦夜哦左幾年, 最後總於見到耶穌, 跟住同工上山落海成功戒毒洗禮, 宜家住係我地宿舍同時慢慢成為我地街訪嘅小前鋒, 係街頭走來走去, 派下雪條同人坐底傾下計, 當班街友講完野之後, 佢就會砍頭講一句:
“你咁樣唔得架, 靠自己戒唔到架, 要靠耶穌!, 我得你都可以!”
可能佢講一句好過我地講十句。
宿舍開始多人啦, 因為開始有人冒名而來。之前我地會笑自己係最無效率, 雖然宜家都唔係咩高效能, 但係近來班街友因為開始見到有人跟我地走之後, 就係到觀察我地, 而又好似見到有D曙光, 又真係有人會唔同左咁出返黎, 雖然仲有好多都仲係得把口話想改, 但係我相信, 果份盼望嘅微光正係佢地內心到開始攻佔一席之地。
