冇家庭冇國籍冇身份
我哋其中一位會員係同工喺街頭度認識, 神智唔係太清醒嘅佢身體上面有好多傷患, 但佢唔太識得照顧自己, 只係簡單用紙巾包住, 一如以往我哋都係邀請佢嚟食飯由食物開始陪佢行一段路。
之後發現原來佢本身都唔係香港人, 但身上面都冇任何身份證明, 係阿邊街坊同我地講過小小佢過去嘅野, 大約就係, 年輕嘅佢唔係住喺香港, 只不過係嫁咗過嚟之後, 最後嗰個男人揼低咗佢, 而佢因為接受唔到整個人崩潰咗, 從此就流落街頭。 佢除咗食飯時間會嚟我哋餐廳, 其他時間佢會喺整個土瓜灣區度流浪, 佢會用手搣自己頭髮做好多令到自己痛嘅行為, 其實我哋都唔知可以點樣, 除咗繼續係呢條路到陪住佢。
前幾日, 我哋收到政府通知, 因為佢精神失常又冇任何身份證明文件, 所以政府嘅結論就係如果佢離開香港就唔可以再返返嚟。但係下一步係點佢哋都答唔到, 因為唔知佢喺邊度嚟都唔可以遞解佢出境, 捉咗佢都唔知要送佢去邊都唔知要點樣處置, 就好似好耐之前一套外國戲”the terminal”一樣, 唔會有人捉佢唔會有人理佢希望放佢喺度等有去一日自己走, 或者係自然流失。
早幾日同其他同工傾, 到底當初開土瓜灣舖係唔係考慮得唔夠, 始終至今呢間舖都係好艱辛。但係當想到唔同出咗狀況嘅街坊會自己走入嚟, 甚至乎呢一個舖慢慢成為上面嗰位女士唯一一個會定時定後出現, 同有人認識佢嘅地方, 就突然覺得整個土瓜灣事工嘅開展都係好有價值, 起碼我哋照顧緊好多年政府都唔知要點樣照顧嘅人, 起碼我地仍然看待所有會員都係一個人, 而唔係一個要處理嘅個案, 因為我地從來都唔需要跑個案數, 我地可以一個個咁陪。
其實MANNA真係好有效率, 只不過係可能我哋睇效率呢個字有少少唔同。
