如果要數令MANNA最感恩嘅事工, 一定唔小得我地職業培訓呢一Part。我地140幾位唔同範疇嘅同工之中, 包括左好多唔同類型嘅人, 多種案底更新人仕, 戒毒後生仔女, 情緒病人, 精神病康復, 單親, 少數族裔, 退休長者, 破產等等, 三山五嶽唔多唔少都佔左我地6到7成。而為咩要為呢個事工感恩呢? 就係睇住同工由咩都唔識, 總係驚驚青青, 到可以獨當一面, 成個歷程睇住個轉變, 真心驚嘆上主嘅大能同愛。
或者大家唔知, 我地其實唔同鋪同集中左唔同情況嘅同工, 例如有一間主要係更新同工負責, 有一間主要由一班媽咪婦女負責。 而有一間當中更係由一位思覺失調康復同工做大佬負責, 而佢呢3年嘅時間, 可以講連我自己都對呢個病重新認識, 同工果份強大果份心力, 唔好話係唔係康復者, 隨時比無病無痛嘅人更強大更上心, 而佢都總係經常好謙虛咁話, 全靠主得力。 果日人手唔夠, 佢會叫哂大家開市前禱告, 遇到有同工唔乖攪事, 佢會禱告求智慧, 擔心自己唔夠手快, 會早一日即使放假都返去準備食材, 永遠早一小時返工遲一小時放工, 為嘅, 就係敬業地想做好件事, 或者係因為佢知道自己反應未必夠人好, 所以自己一開始總係付出更多努力, 但即使佢做左咁耐其實一直就應付有餘, 都仍然保持住呢份初心。
因為佢話過, 好感恩自己嘅情況, 都可以被主使用, 呢份工作就係佢嘅召命, 就係佢嘅事奉, 所以就一直保持住如佢個名一樣嘅初心。介紹返, 我地嘅好同工, 阿初, 大佬初。
