講到關係，想起一個我自己很喜歡的故事。有位經常嚟拎飯、好鐘意食炒蛋同菜嘅媽咪，佢有兩個女，一向對我哋好有禮貌，唔該前唔該後咁樣，記憶點好深。我只係做咗一年左右，唔記得邊日開始佢同我分享佢家庭同婚姻嘅掙扎，我為佢按手禱告，即使我完全唔知道點樣同理到佢嘅痛苦。有時我哋會whatsapp傾下計，佢講下佢啲女，最近做緊乜，感情史，乜都講下，我講下自己返工嘅嘢同生活，好似朋友咁。
直到有日，我諗到大部分受惠朋友都係住翠屏村, 但係自己似乎唔了解呢個地方。而個位媽咪住翠屏村，所以我拜托佢搵曰帶我走一轉條村，影下相做記錄。個朝早, 同佢一齊食早餐，陪佢送個女去基教，佢就帶我去佢平時打躉嘅中心、阿女返學嘅學校、佢住個棟building、佢買雙餸飯嘅餐廳，好鉅細無遺但好有生活氣息嘅細節。個日我好驚嘆翠屏村真係好靚，好似走進咗一個我唔了解而對某個人嚟講係日常嘅世界。臨走前去趟超市，撞到一個好常喺餐廳出現嘅家庭，應該都係住翠屏村。個仔大嗌：爸爸，係嗎哪姐姐吖！（我哋唔熟所以唔知對方嘅名哈哈）爸爸問我：乜休息日都返嚟，咁鐘意呢度吖？我話：係吖哈哈。
於是有咗翠屏邨呢輯相。
我唔知點形容個日嘅心情，但有種活着真好嘅感覺。諗返由開始嘅懵懂妹豬，到依家年半兩年後，或者都仍然係舊飯。嗎哪曾經成為咗我信仰上嘅驕傲同偶像，到依家，阿婆仍然係我嘅十字架，我仍然可以好燥底，仍然係日日諗幾時resign好。我冇乜好想堅持嘅原因，但如果唔知明天同意外邊樣先來到，不如先做落去。可能呢個地方呢個季節仍有上帝想我帶來轉變，或者轉變我嘅部份呢。
From 一位嗎哪同工
