本來好地地有地方住, 但係因為屋企問題而要自己生活, 岩岩幾日前最大雨果幾晚, 舊地方就因為完約而要走出街頭, 新地方又因為未處理好要等到下星期二三先住得, 結果就攪到呢個年紀要走去訓急症室, 一次機會, 佢行過我地土瓜灣鋪, 見到我地POSTER就走左入黎, 去到今晚, 完左我地聚會之後, 佢同我地同工講可唔可以送佢返去訓, 一問之後, 話送佢去醫院就發現左呢件事。同工當下得兩個選擇, 一就係親自送佢去醫院之後由佢, 二就係夜晚晚同佢死都搵個地方落腳, 最後同工們上下一心都俾到個地方婆婆住住先。
路途中婆婆好開心, 話好幸運遇到MANNA呢班友仔, 同時都同我地同工分享佢個佛教信仰點樣幫佢支持呢幾十年, 令佢可以快樂面對, 而同工又同佢講返我地個耶穌點樣令到我地開始MANNA呢個地方。而呢個對話最正嘅就係大家都好堅持咁講大家睇法, 而MANNA呢個地方, 就正正係唔會在意你信嘅係咩, 你過去係點, 又或者件事係唔係呢間餐廳要做嘅野, 總之就幫左先再review。
婆婆講到之後有幾次覆診同未來幾日唔知點算, 同工就決定同佢鬥MANNA最叻嘅耐性, 用時間走入佢生命所有嘅野, 照顧佢呢段時間, 處理佢間屋, 之後陪佢去醫院飲茶行街食飯睇戲, 你仔女唔照顧你, 咁就我地照顧你。到時睇下你個神有說服力, 定係我地個神有感染力。
