喺事奉入面最大嘅受惠人，其實一直都係自己

喺事奉入面最大嘅受惠人，其實一直都係自己

早前有個機會去同工負責嘅長者活動，喺個活動期間有個意想不到嘅情況出現，就係自己畀其中一位長者醫治咗自己。

今次呢個長者活動係同大家飲茶傾下計，本身都諗緊可以同班長者傾啲咩？因為又唔係咁熟悉佢哋，自己只係臨時加入，但最後一位坐咗喺自己身邊嘅婆婆，佢好健談咁樣將自己嘅故事一五一十咁講咗畀我聽。婆婆係一個好喜樂好懂得感恩嘅人，但係佢嘅經歷喺我聽嘅耳中真係仲苦過deedee。佢而家係一個接近80歲嘅婆婆照顧緊一個接近100歲嘅媽咪，佢因為想媽咪開心，所以佢哋兩位婆婆而家係一齊住，冇去到老人院。同時，呢個婆婆過去經歷咗好多嘢，年輕嘅時候畀人欺騙，畀人欺負不特止，中間經歷兒子早死丈夫早死父親早死，但係每一個情景入面，佢都搵到上主對佢嘅恩典同照顧。甚至乎飲茶間，佢收到個電話，原來朋友問佢去咗邊，佢就超級開心咁樣講今日同咗我哋去飲茶真係好開心好開心，係嗰種好似一個小朋友見到粒糖一份新玩具嗰種由心嘅開心。呢個婆婆，喺信仰入面就係不斷做緊愛錫自己愛錫身邊人嘅角色。
一個經歷咗咁多甚至乎而家都仲捱緊嘅婆婆，佢對我嘅口頭禪就係
“你信我啦耶穌真係好好㗎。”，而我亦都答佢“喺你身上我睇得見呀，多謝你”

呢個婆婆看待事物同經歷嘅眼光同心態，對準自己所相信嘅嘢嘅能力，完完全全咁醫治咗迷惘嘅我，婆婆亦都重新演繹咗到底咩係上主嘅同在。原來真正嘅同在，就係於無可改變嘅環境下，仍然有足夠走落去嘅能力同信心。自己都不禁反問自己，＂我在煩惱什麼？＂

果然，喺事奉入面最大嘅受惠人，其實一直都係自己。