圓

坐底數一數, 原來不經不覺MANNA經已有11個地方。當中3個係宿舍, 1個係菲律賓嘅兒童照護所, 其他都係餐廳相關嘅地點。去到今日, 因為大家嘅支持同信任, 呢個體制, 令到我地無家者同更新事工, 慢慢一步步咁成為一個”圓”, 而呢個“圓”係咩意思呢? 佢就好似一個循環咁, 由同工去到街上探訪認識街友開始, 再透過佢地之間嘅關係, 團契活動, 去協助同鼓勵佢地離開條街或者毒品, 呢個時間, MANNA宿舍就成為同工手中嘅武器。之後, 同工陪住佢地經歷半禁閉嘅第一期宿舍, 如果佢地真係有決心重新出發, 就可以去到開放式嘅第二期宿舍, 透過運動同埋靈修去輔助, 再進入我地咁多間餐廳到工作, 由街友變為受惠人, 再由受惠人轉為同工戰友, 由黎食免費飯, 到去煮返野食俾人。最後除左係MANNA到工作外, 如果順利的話, 或者就可以行埋最後一步完成呢個圓, 就係返去當初佢離開嘅地方, 同其他人同行邀請佢地離開, 一齊走入呢個圓。

目前, 最後果步都未算真係有人行到, 但係我地相信, 如果上主批准的話, 呢個圓就真係可以成型。未來日子仲有幾耐真心唔知, MANNA開支越黎越誇張地大, 但係回想過去就係個個月都唔知有無下個月, 所以先會做左先再Review, 免得自己後悔。 感恩, MANNA宜家基本成為左一個大家都有份嘅群體, 所有黎食飯嘅人, 叫我地到會, 又或者直接奉獻支持, 義工, 同工, 又或者係所有免我地租或者送物資俾我地嘅你你你你你, 往後日子請繼續多多指教, 愛錫我地等我地可以持續做間不務正業嘅餐廳。