感恩香港仍有相信結連同工嘅人, 令我地可以集小善成大愛
因為有一班係啟德住嘅居民自願組織協調, 令到我地有機會將食物直接入到營地, 將資源直接送到居民手上, 9成都食哂, 無浪費, 係D湯飲唔哂, 可能因為佢地唔知我地D湯無味精, 意為係茶記例水。明天飯盒需要會增加一倍, 希望大家食得開心, 希望所有野都可以持續互相效力協調。
雖然之後安排係點未知, 但係一如我地過去分享, 食物都只係我地結識人同想一步步接近佢關心佢, 想同佢行耐D嘅入門。之後我地仍然會將我地做緊嘅野搵方法同災民們結連, 我地仍然會為佢地搵二手傢俱, 仍然會為受影響而離開左大埔嘅長者送飯, 因為都知道唔係所有長者都有人照顧, 為嘅, 只係想等一個機會, 可以聽佢地講多D, 陪佢地行呢段路。始終香港物資一向都唔會真係缺, 缺嘅可能只係有耐心嘅同行人。
一兩個月前, 台灣水災, 一開始社區都好熱心, 但係慢慢網路上就因為多左好多唔同資訊, 令到人心轉哂風向, 多左好多指控, 懷疑, 最後整個社區義務活動成為一個大型網上聲討作結尾。而大家都知, 網路同媒體為左吸眼球, 佢地會用盡所有方法去報導或分享一D肯定引起議論嘅人同事。唯願我地香港今次, 有上主作中保, 願我地今次咁同心而且大型嘅結連, 大家都會盡力明白同理解, 盡力看見大家不同中嘅愛同優點, 盡力不忘記, 當初大家行出黎都係因為愛香港呢個家。
我地仍然會盡力去做盡力去搵同陪哀傷嘅人。願香港人以愛勝惡, 獅子山下同心互助。
