我地事奉唔係因為我地完美

大多人都會意為係MANNA做野嘅人, 都係天生好耐性好禮貌好有心想事奉想服務社區, 但其實呢個一直都係好大嘅誤會。 好多時候我地嘅同工都會俾人投訴態度唔好, 又或者同工又會經常出現心理唔平衡嘅情況, 因為我地平日除左要服務一般客人之外, 仲要處理唔同社區情緒病人, 無家者, 更新朋友, 長者等等。其實佢地壓力好大, 更有一次我同一個樓面妹妹傾計嘅時候, 佢喊住同我講

“D阿婆真係好無禮貌, 成日俾佢地用粗口話, 我真係好想掉哂D阿婆扔落街”

“我明白, 因為我都俾好多受惠朋友問候過, 有幾難聽都試過, 仲試過俾佢地打”

佢好乖, 傾完講完之後就返去自己岡位再行落去, 而當然都無任何阿婆俾人扔過落街。

早前佢text我, 佢咁樣講:

“諗起朝早有人問我, 唔理解點解後生仔女要做餐飲, 辛苦, 長時間對人, 受氣。準確嚟講係問我「點解要喺呢度做」我思考左好耐, 可能真係出於愛。呢兩日有個叔叔突然之間鬧我臭X, 我淨係同佢講：唔好咁樣話自己啦, 之後覺得成件事好好笑, 因為佢個樣好谷氣。我好似成熟咗好多, 喺呢個地方, 唔使再掉阿婆落街啦我”

見到佢D字, 我有兩個感覺, 第一個感覺係惱, 如果俾我搵到鬧我地個女嘅果兩位”叔叔”, 我會好好認真同你”交流 切磋”之後自己報警自首, 請你唔好欺善怕惡。第二個感覺, 係更大嘅感覺, 係令到我個惱都慢慢唔見左嘅感覺。

個感覺係, 我地個乖女係MANNA到慢慢大個啦。