我地仍然會盡力

或者我地做得唔係最好, 都做唔哂所有, 但係MANNA上下同工真心盡左。

9月報表出左, 為左令到大家都可以睇實我地, 一年一次審計報告之外, 呢個報表我地個個月都會盡快放上我地網站, 係公開查閱嘅。過去我地所有事工進展都好慢, 因為總係一個一個咁認識, 一個一個咁去接觸, 人手唔夠令到我地真係未必個個都可以即時回應到, 但係就因為慢同要時間, 令到同工開始左嘅關係, 至今我未聽個佢地會主動放棄, 俾人嘈俾人呃俾人問候全家俾人要脅, 到俾人打埋啦, 我自己都試過。但係同工總係見到果位朋友後邊嘅故事, 總係幫佢諗埋個原因去點樣重新再同佢同行。

作為餐廳, 攪個營運都夠哂睏夠哂煩, 但係召命就係召命, 大把同工把口同我講完唔做, 之後第二日又係見佢死死地氣咁返去事奉, 因為MANNA對我地而言唔止係一份工, 仲係我地嘅團契, 係我地教會, 係我地實踐同看見上主作為嘅地方。但係我地成個群體仲係好年輕, 疫情開始學習事奉, 到宜家日子尚短, 我地無諗過可以同咩大機構去比較, 因為我地年月仲係太短太短。但係MANNA同工往往有好多驚喜俾到大家, 只係個9月, 清潔工, 無家者, 少數族裔, 難民, 獨居長者, 你諗得出嘅弱勢群體只要係佢地力有所及嘅, 都盡力去做, 仲去埋菲律賓起屋振災。目前我地無任何政府資助, 但係一月經已要用到上百萬咁制, 即使香港個市越黎越差, 我地餐廳收入都好受影響, 但係個社關開支從來都係要用就用, 因為我地打從無諗過要有儲備, 打從無諗過下個月點算, 只係做到幾耐就幾耐, 做到幾多就幾多, 因為聖經教佢地嘅, 只係個盡字。

但係我地仍然會努力, 諗多D諗好D, 令到多D人可以參與, 可以加入, 令更多人可以盡D。或者我地做得唔係最好, 都做唔哂所有, 但係MANNA上下同工真心盡左。