是女兒，不是妓女
對上一次去到我哋嘅兒童照護所，迎面而來嘅就好似拍戲嘅場面一樣，有好多小朋友衝過嚟想攬住你，話掛住你。而今次，班小朋友自己編排咗舞蹈表演畀我哋睇，係由其中幾位好有跳舞天份嘅小朋友自己負責。佢哋幾個最近喺海邊接受咗洗禮，冇嘢做嘅時候經常出入我哋嘅照護所學習聖經，有時仲會幫手照顧其他小朋友。過去貧民窟嘅小朋友基本上係一代傳一代咁樣好難脫離貧窮，男嘅大個咗一係就去非法採礦一係就繼續喺垃圾場上面生活，女嘅因為接受教育唔多所以連出去做女傭嘅機會都冇，基本上唔會搵到咩工作。而我哋去嘅地方當地政府馬不停蹄開設賭場，過往經驗當有賭場同埋旅遊業發展嘅時候，地下事業峂會發展得好蓬勃，而貧窮國家大家都知道冇嘢做嘅女仔，好多時最大同最易嘅出路，就係成為妓女。
而今次我喺嗰幾位女孩子身上面，睇得見盼望，或者我哋並唔係可以令到佢哋脫貧，正如我哋喺香港嘅事工一樣，其實都只係同行陪伴而未成功令到人脫貧過。但係而家我哋嘅照顧所呢個地方，起碼可以令到佢哋唔使捱餓，未去到非出賣身體不可嘅情況。而且，透過聖經教導，佢哋明白生命可能有其選擇，雖然而家只係少少幾個小朋友接受洗禮，但係一年後呢？兩年後呢？可能之後呢一隊小精兵，就會成為當地嘅曙光
感謝大家一直同行同信任, 等呢件美事可以持續落去。
