更新宿舍, 需要更新
喺整個更新事工入面, 我哋由認識到提供住宿, 陪伴同行, 戒癮, 到穩定啦, 開始提供工作培訓同安排工作, 當中其實住宿呢一環真係好重要。正正係因為我哋開始營運宿舍, 我哋可以提供一個環境畀佢哋同出面世界暫時分開, 從而慢慢面對自己嘅過去, 後面嘅工作培訓同工作安排先至可以配合而生, 最後重返社會, 家人團聚。
而今次強風過後, 整個宿舍好多問題都顯現咗出嚟, 除咗有一啲表面嘅破壞之外, 入面一啲例如滲水, 電力問題甚至乎細到連門鎖都出現問題, 其實都係時候要更換。我哋呢一個宿舍由營運到而家, 都因為我哋缺乏資源而冇修葺過, 所以都想藉著今次打風過後睇下可唔可以一次過翻新等上嚟更新嘅宿友都可以有一個安全啲嘅環境等呢一個事工可以繼續服務落去。目前我地呢個事工, 完全無任何基金支持, 都無政府支援, 但係就接收緊好多唔同情況唔同年齡嘅朋友, 透過我地信仰, 去嘗試一條新嘅道路。
所有浪子, 由街邊返到屋企, 個個都要好長時間, 而耐嘅唔係因為步行距離, 而係因為生命轉變需要時間同埋同行。願MANNA可以同佢地行長D時間, 願上主俾更多時間我地, 等我地可以係佢地每一個更新路上嘅上落起跌到陪到最後。
