最想搵返自己失聯左果4個女
今年70歲嘅袁錦添, 我哋大家都叫佢做添叔。認識咗佢接近六年, 由佢嚟我哋到接受我哋幫助攞飯開始, 去到願意放低過去嚟到我哋宿舍一齊生活, 中間都經歷左好多故事。而因為年紀嘅問題, 身體好多嘢都開始變差, 幾個星期前佢就因為蕩失路, 認唔到路返宿舍, 最後自己行動唔方便體力透支喺樓梯度跌低咗, 最後仲唔識用電話坐左係地, 好在有村民見到幫手報警。今次醫院有姑娘嚟同佢做一啲檢查, 發現佢認知能力危機意識同埋自理能力都好差, 就好似唔知自己經已老左一樣, 再加上佢過去嘅不良習慣即使佢而家已經改過都好, 但係身體仲有好多嘢都已經難以逆轉。雖然而家佢仲叫做可以自己食飯自己沖涼等等,但係我哋宿舍因為全部宿友朝, 一早都要去到唔同門鋪度返工或者出席我哋更新program嘅活動, 所以目前真係未有人可以24小時有人照顧到佢。
今日同佢傾開偈, 佢話佢其實心頭最掛住嘅就係佢四個女。添叔呢一位後生嘅時候, 行走江湖咩都唔驚嘅伯伯, 佢一提起四個女嘅事嘅時候, 嗰個做爸爸嘅溫柔又會出返嚟。佢話畀我聽, 話佢四個女已經十幾年冇見, 而佢哋唔係因為關係唔好而唔聯絡, 而係因為自己喺最近嗰十年更新嘅期間, 成日要換電話有時又要出入監獄所以最後就失去咗聯絡。
以我認識現在嘅添叔, 自從佢信咗耶穌同埋下定決心還曬所有過去纏繞佢嘅事之後, 佢而家絕對係一個尋常不過嘅老人家, 而家佢最大嘅心願就係可以搵得返佢四個女。如果阿女你地咁啱見到呢一個post, 你又想搵返袁錦添, 嘅不妨聯絡我哋。佢話佢唔係想要啲咩, 只不過係想傾個電話, 可以嘅就見過面。佢話真係好掛住你哋。又或者如果咁啱你身邊係有個姐袁嘅姊妹, 過去一直父親都唔喺佢身邊嘅, 不妨將袁錦添呢個名問下佢睇下佢識唔識。
我地都唔知可以照顧到佢幾時, 希望阿女你地願意搵返爸爸。
