關係可以超越好多野
果日有位92歲嘅婆婆去到深水埗到同我地同工見面, 想做會員食慈惠飯, 咁我自己就係旁邊聽下佢地傾咩, 婆婆主要係問到到底可以攞幾耐飯? 因為佢自己有長期需要, 當佢知道我地無時間限制嘅時候成個樣放心哂。
咁我就多口問下婆婆到底住邊, 原來佢住葵芳, 咁我就同婆婆講我地葵芳都有攞飯點阿, 可以唔使咁遠黎深水埗阿, 但係婆婆都話可以照去深水埗, 因為門口就有巴士, 到我地鋪門口, 反而葵芳去葵芳行得仲多, 咁之後我就話咁不如我地送埋上你屋企啦? 點知婆婆就話唔想日日坐係屋企, 因為都成92歲啦, 想出得去就出下去。
婆婆雖然老, 但係精神幾好, 係身體差小小, 講到最後原來佢堅持都係想去深水埗唔想近近地係葵芳, 係因為深水埗呢到有朋友, 而佢識黎到MANNA都係因為有朋友話佢知呢到有野食同有活動玩。所以講到尾, 婆婆都係要班朋友仔, 要關係, 都唔要方便D嘅服務