食好小小之後就要去打仗

之前好簡單介紹過呢位姊妹有癌症, 晚上MANNA幾個同工同佢食飯, 食佢鐘意食嘅野, 因為佢準備要戒口打大仗, 做化療。記得第一次見面, 佢介紹自己係一位於佛堂幫手做清潔嘅朋友。 當時講緊係疫情間, 因為時勢唔好所以上到黎MANNA食慈惠飯, 之後慢慢係到食飯傾多左計, 慢慢認識再多左。

係幾年前佢得到癌症, 令到佢更加日日上MANNA, 因為佢去唔到好多地方, 佢總係會黎食下野同其他客或者同工傾下計, 之後就返屋企, 令到佢慢慢開始認識我地個天父。而次次見到佢, 佢都總係好開心, 話俾我地知個天點樣幫佢, 令到佢又搵到好醫生, 即使治療緊但係又食到又訓到, 正當佢開始問我地未來好返想係MANNA到幫下手嘅時候, 就好似睇戲咁, 唔好嘅事就發生。

治療左兩年意為就好嘅佢, 突然發現癌症復發, 即時大受打撃, 佢自己都話醫癌症唔驚, 最驚就係復發, 所有治療嘅辛酸出返哂黎。同時, 佢丈夫仲係呢個時候決定同佢離婚。當下佢都好無助, 身心靈都好睏, 同時又無錢去接受詳細檢查。最後同工夾錢去俾佢做詳細檢查抽針同做化驗, 令到佢可以盡快俾醫生制定下一步應該點治療。

“我鐘意打邊爐, 最鐘意海鮮, 之後又唔食得啦”
“咁不如打仗之前食一次啦我地”
結果我地就係MANNA到打邊爐, 傾計, 禱告。

佢有無喊有無唔明呢? 佢自己都話有。我地都好擔心佢, 但係第二日佢反而好堅定咁安慰我地話”如果上主俾得呢個經歷佢, 佢一定會幫自己過。”我自己個心都好敬佩佢呢份咁大嘅信心! 近來見返到佢,, 佢話
“所有野都出奇定咁順利, 2月應該會完成化療, 到時我想係MANNA到決志, 係大家面前信耶穌”
“歡迎, 為你大感恩”
“2月見, 到時我地再打邊爐啦”
“無問題。