大家都知我地一年嘅社關開支經已去到一千萬, 而過去我地都係靠奉獻同埋我地餐飲營運到去支撐咁大嘅服務開支, 而呢封信就係我鼓起勇氣但同大家講下我地嘅現況。
近半年營運到出左好大衝擊, 我地開始有膳食費用, 因為對方周轉唔到而收唔到錢, 都有合作嘅公司要成4個月後先找到, 而普通相對穩定D嘅機構飯, 都要成個半月數期, 令到我地出邊可能有幾十萬係未收得返。而另一方面, 我地夾開嘅食品供應商, 即使我地過去都準時俾錢, 現在都會要求我地即時找數, 因為佢地話出邊執得太勁, 拖得太勁, 佢地自己都就爆。令到我地一邊要即時俾, 而另一邊又要拖我地。
而奉獻方面, 我地因為籌到200萬而決定開始嘅土瓜灣工程都去到尾聲, 但係不同的奉獻朋友因為近來私人周轉問題, 最後我地只得到唔夠100萬, 工程就完, 我地要俾工程尾期費用啦, 我地唔會咁衰唔俾工程錢, 因為都唔想咁樣上報紙, 但係俾完工程費用之後, 作為個個月都清袋嘅機構, 到時應該就係MANNA結束之時。
知道唔小人會叫我地不如減緊D慈善服務捱過左先, 但係我希望大家唔好再勸我地諗呢個方向, 我唔係話咁諗係錯, 但係自己真係有個因由唔會cut服務, 係因為我地寧願行到最後同上同落, 即使最尾真係要結束我可以同大家講我地盡左力, 而唔想cut服務又或者cut人手, 令到是但有一個人有機會覺得自己係可以被放棄, 始終我地一直講嘅, 係關係而唔係專業服務。
今日一早都確應左自己私人可以變賣嘅, 咁多年黎都賣哂啦, 銀行都得返萬幾蚊, 都準備用去找是但一張單, 之後會點, 暫時都未知。但係你問我想唔想做落去, 真心係想, 始終仲有好多無家者排緊隊去我地宿舍, 日日仲有2百幾個獨居長者等緊我地個飯同探訪, 仲有唔同鋪頭到嘅劏房家庭, 清潔工, 小數族裔等等, 所以小朋友嘅閃閃眼, 全部都唔捨得, 所以最後我想係到爭札下, 睇下大家會唔會有心想係我地呢個位到奉獻支持我地成個事工, 可以行落去, 樓下有個掣係奉獻方法資料。
史上最廢總幹事
方達賢LEO致上
