MANNA十年
距離上一次籌款, 咁就過左一年。所以想係到再次將MANNA嘅情況同發展同大家黎個小結, 到目前為止, 我地仍然係未有任何政府資助嘅機構, 一直都係好神蹟咁有好多香港人多多小小咁聚小成多, 令到MANNA行到今日。今日, 想係到邀請大家花D時間, 了解下我地近況。
人生唔知有幾多個十年, MANNA就踏入第一個十年, 2015大埔開始到今日, 上主使用, 香港人同行, 我地好似咁岩見證住香港上落, 同時又經歷住大大小小嘅神蹟。我地可能係香港第一間由普通餐廳變為註冊慈善機構嘅群體, 都可能係最不務正業嘅餐廳, 我地不知天高地厚咁, 想可以係餐飲到搵到資源自負營虧去做扶貧工作, 我地無任何後台無大機構背景, 只係想盡力陪身邊出現嘅任何一個人, 我地陪唔哂所有人, 但係陪陪下, 我地就由只提供食物支援開始, 就陪到出現左補習, 長者送飯, 更新事工, 宿舍, 中醫服務, 客旅事工, 體育音樂等等, 最近仲開始埋孤兒院。
感謝大家, 我地餐飲唔係咩大連鎖餐廳, 營運能力仲係學習同改善階段, 由一開始一間門鋪去到今日大家俾機會同俾意見底下, 唔同門鋪同餐飲服務經已可以協助MANNA回收到接近6成總開支。雖然仲未可以完全照顧哂社關開支, 但係, 就令到MANNA成為一個可以將所有接收到嘅奉獻, 都用哂落受惠人同事工上, 因為我地餐廳收入經已可以take care哂所有admin cost有餘。
但係我地仍然需要大家支持, 因為到今時今日, 我地年社關開支, 即係唔計餐廳食材租果D, 只計服務上嘅野, 經已去到需要一千五百幾萬一年, 呢個係一個令自己腳震嘅數字, 始終我地唔係咩有錢佬想做善事, 我呢個最廢總幹事上個月自己銀行先得返$148.75, “不自量力”係我過去收到最多嘅Comment。但我地至今都將MANNA呢個字嘅意思發揮到極致, 永遠都係最後一分鐘先知道捱唔捱得過月尾, 如果唔係神蹟, 唔係你地同行, 我地應該當初第一個月就可以安息主懷, 我地嘅不自量力, 成為我地同工上下見證恩典嘅機會。
我地銀行月月清, 令到好多維修, 特別係我地食物工場上好多機件設備, 都一直更換唔到, 就連我地更新宿舍, 其實都好多地方需要維修, 好多野都係一個最低限度下運轉緊, 即係成日要擔驚受怕有野壊, 就會成個機構立即脫軌。同時我地都急需一個更大嘅雪房, 去處理我地日益增長嘅食材, 單單計慈惠飯, 我地一個月就出緊接近2萬份食物, 另一方面我地都看見長者送飯嘅需要所以估計會越黎越大量。但係食物工場嘅更換講緊需要4百幾萬嘅工程費用, 的確令到我地去到一個進退維谷嘅局面。
我地相信, MANNA事工過去同未來, 要決定一個事工開唔開始, 唔係用效益或者有幾多資源去決定, 開展事工只係想好單純好單純咁, 傳達一個信息俾受惠人知道, “我地想嘗試同你行一段路, 因為上主看得見你, 都叫我地看得見你。” 看得見你, 成為我地所有事工最核心嘅信息, 始終, 我地好多事工係源於有需要嘅請求, 但我地的確未有能力處理哂所有問題, 但至少, 我地會盡力係人身邊。