大家都知我哋近來發生同經歷緊嘅動盪，首當其衝嘅同埋最大影響嘅一定係土瓜灣同埋大角咀兩間舖留低嘅同工。本身人手已經唔夠，再加上其他舖又有需要，所以土瓜灣短期內犧牲咗自己，補咗其他地點嘅不足。土瓜灣舖嘅同工，感謝佢地都好明白宜家嘅情況而好願配合。
仲記得由一開始同土瓜灣同工文字溝通，到見真人傾下土瓜灣未來嘅安排，都好感受到佢嘅肉緊。可能佢擔心土瓜灣MANNA最尾會因為我哋嘅財務壓力，而放棄做落去，聽住佢不斷訴說過去，係一年入面見證到呢個社區嘅人同埋事，感受就係好真摰。特別佢講到喺短短呢段日子，就有五個會員分別離世，有好幾位係未必有直接嘅監護人，醫院或者院牧係會聯絡我地同工，有啲臨離開前我哋為佢進行灑禮，之後一段時間就走左。而同工裡解到嘅，就係我哋嘅陪伴即使未必改變到好多嘢，但係起碼我哋可以畀佢哋知道，最後一段路仍然會有人陪佢，同埋之後仍然會有人記得佢嘅名字。甚至乎我哋嘅食物支援，土瓜灣都未必係最多受惠人嘅一間，關心緊嘅可能都只係七十幾人，但係同工不斷講出佢哋嘅名字佢哋嘅背景佢哋嘅需要，同埋佢哋點樣咁啱卡咗喺制度同制度中間，得唔到其他支援，只可以靠土瓜灣嘅同工。整個對答，好感受到土瓜灣舖嘅同工同個社區結連已經有幾咁深。
土瓜灣MANNA同我哋其他舖一樣【餐廳】可能都只係我哋嘅偽裝，入面發生咗好多好奇怪嘅嘢，有中醫有剪頭髮有晚會有電影分享有補習，坐埋一齊嘅有無家者有天台屋朋友有癌症病人有情緒病人有戒毒人士有其他教會義工，呢一種睇落九唔搭八牛頭唔搭馬嘴嘅組合，正正突顯咗我哋MANNA嘅文化同埋特徵。
我哋只係調整。雖然可能需要比較長嘅時間，但係要做嘅嘢我哋都會盡全力堅持落去，大家或者可以將我哋嘅故事同身邊嘅人講，等多啲人同我哋一齊行呢條路，等我哋可以喺呢個咁艱辛嘅日子，仍然leave no one behind。