MANNA慈惠飯派發個數好似慢慢上緊

記得疫情最高位嘅時候我地一間觀塘一個月派緊15,000份食物, 之後感恩慢慢回落到7千幾個一個月。但係近來唔知咩原因, 又上緊去9千幾個接近10,000一個月。吉鋪多左, 可能咁樣令到好多前線工作位置小左, 種種唔同因素, 實際原因係咩令到需要支援嘅人多左, 我地都唔肯定。仲記得疫情完左之後, 我地有諗過就此結業, 好似完成左個使命咁, 始終我地個結構一向都唔太健康, 光榮結束總好過最後頂唔住執左佢, 但係最後諗到班同工同街友長者等等, 都係覺得不如都係做多陣做到唔得先算, 結果就行到今日。

MANNA慈惠飯指數就好似一個反映緊香港情況嘅小指標咁, 而我地唔係咩分析機構, 都唔係咩大型NGO, 即使我地唔知可以做到幾時, 但係我地同工們上下都準備好紮好個馬, 同大家去面對個未來, 希望香港平安走過黎緊嘅高低起跌。