MANNA會係大角咀開始一個小型庇護家舍
張相到係兩個客旅(少數族裔)小朋友, 趁夜晚街小人D, 可以落去玩紙皮, 佢地生活一直就好似仲停留係6-70年代嘅香港咁樣。至於我地為咩又不務正業開始庇護家舍, 就係前排同大家提過係醫院令到我地好想好想保護嘅小女孩, 我地之後發現果個男人仲會係屋企到吸毒, 我地腦海即時出現返好多畫面, 出現之前小朋友唔小心食左毒品嘅新聞, 諗返起過去發生過發現會員無黎幾日結果到搵佢時, 只係發現屍體, 好驚, 如果我地唔回應, 我地再見到個小女孩嘅時候, 會變成點。
過去幾星期我地都盡左力去搵唔同機構部門去搵解決方法, 但係估計短期都唔會有幾好方案, 所以我地決定會係我地大角咀鋪附近租地方, 俾佢地避下先, 點解係大角咀? 因為近關心開佢地嘅同工, 我地可以支援到幾多, 同時都近小朋友讀書嘅地方。
但係有無困難呢? 其實真係有。一來我地開支有幾勁大家都知, 二來, 因為我地唔想講大話, 我地將我地用途講出去之後, 幾次睇樓睇到尾業主都係唔肯租俾我地, 所以你地有無識人, 又或者咁岩你就係果個人, 咁岩係果區, 有細單位可以租俾我地用, 更或者係免費俾我地用, 佢地一家好乖, 唔會攪到單位亂七八糟, 而我地都會有同工睇住。我知道MANNA做嘅野總係會有人評擊或者唔明白, 但係, 我地相信, 呢個或者就係MANNA係2025仍然存在嘅位置, 就係盡力去回應一D係制度以外嘅人同事。
MANNA嘅事工, 做嘅目的, 都唔係為左咩解決長遠問題, 我地為嘅只係話俾人知道, 上主看見, 我地都看見。