大家記唔記得Slam Dunk男兒當入樽到, 有一集係叫【湘北的最大危機】, 果集講嘅就係班主角個個都讀書成績太差, 要準備俾人停賽, 結果隊長組成左湘北精英軍團去幫湘北肥佬軍團補習。
MANNA隊波都要啦, 有小朋友再唔俾心機就要移民, 有小朋友再讀唔好就要停運動, 更特別係有一位隊員, 前一次同佢練波, 發現佢好奇怪, 平時勁多野講但係今日超配合。完左就壁咚佢問佢咩事, 一開始佢都唔想講, 之後慢慢就開左口, 原來呢個中一嘅小朋友, 因為行為問題, 佢校唔俾佢上堂接近三個月, 一返學就要去訓導處坐到放學。之後叫佢去考試, 再因為成績唔好, 走去同佢阿媽講希望佢轉校去一間寄宿學校到讀書。而佢媽咪因為平身都一個照顧3個仔, 唯有聽學校講, 準備俾佢轉去寄宿學校。而我地呢位後生仔, 睇落無野, 但事後佢講, 其實佢覺得身邊所有人都唔要佢, 佢好唔開心, 又但唔知可以點講, 唯有就係扮無事, 佢話咁樣起碼無咁樣衰。
結果我地去家訪佢, 同佢媽咪傾唔夠3分鐘, 媽媽就開始係個仔面前喊, 聽得出做阿媽真係好辛苦, 話從未未試過會有人特登上自己屋企去讚自己個仔。其實佢都好盡力, 但始終照顧3條A都唔係易事, 所以媽咪都好難受:
“邊個阿媽會想個仔唔同自己住”佢流住眼淚咁講
我地同佢講其實佢個仔打波時候好盡責, 好多位其實只要有個好朋友圈的話, 阿仔應該可以行條更好嘅路, 但係佢好似唔太岩去寄宿學校, 因為佢太易受身邊人影響, 同成日急住埋堆。佢媽咪聽完都好認同, 而就係因為咁, 阿仔即時開心返, 我估係因為佢發現, 其實阿媽都唔係想佢走。黎緊我地會開始同佢地學校聯絡, 我地會想保證同阿仔行一段路, 同佢補習好咩都好, 總之睇下可唔可以令到學校俾多小小時間我地, 再觀察多一個學期。可能今次佢會有轉變? 其實佢真心唔壞, 只係小左個學習榜樣。
