一切由以為世間美好都是詐騙開始。
事源有個post主喺Thread出咗個post，話一直都有個心願，就係想喺麥當勞開個party慶祝30歲生日。原本佢只係諗住同朋友一齊食吓玩吓，直到佢聽到一個故事，就改變咗諗法。
佢聽到媽媽嘅朋友分享咗一個親身經歷，當事人話試過同慈善團體帶一班基層小朋友食麥當勞，見到有個小朋友偷偷收埋半份餐。問起原因，小朋友細細聲話：「我想留俾哥哥，佢未食過。」聽到呢件事，佢覺得好不可思議「香港咁富裕嘅地方，竟然有小朋友未食過麥當勞？」
於是決定將生日願望改為同基層嘅家庭喺麥當勞開party，一齊食、一齊玩、一齊切蛋糕，再送份小禮物，將一個本來只屬於自己嘅生日，變成可以同人分享嘅一日。結果，有人睇到個post之後介紹佢搵MANNA。網絡世界嘅力量一向強大，大到令人覺得新奇怪事十居其九都係騙案。不過，我哋憑信心選擇咗「上當」 ，邀請咗HAPPY MONDAY (少數族裔) 晚會嘅媽媽同小朋友一齊參加呢個派對。結果當日真係有得食、有得玩，聽到小朋友話第一次喺麥當勞開party係開心嘅，就更加相信有時要成就世間美好，首先要「選擇相信」。