唔專業都有唔專業嘅好

MANNA呢個群體, 最特別之處就係成日有班唔專業嘅人做唔專業嘅事, 我地作為餐廳但係大多同工都無做過餐飲, 本身都唔係做呢行, 同時又有一班唔係讀社工嘅人做社關, 有唔係做運輸嘅幫人搬屋, 千奇百趣。今日我地其中一位同工, 佢自己無讀過音樂, 但係做住飲食嘅佢一直都對琴好有興趣, 佢自學, 有時會有份敬拜。有一晚, 佢做完野留耐D參加埋個社區晚會, 成個晚會無咩野做, 就係俾大家聚埋傾下計食下野, 結果就係咁, 變成左一個佢自己一對六嘅彈琴興趣班。

係嘅, 件事結局一定唔會係會出到8級琴手, 但係可以肯定, 佢地次次見面, 大家都好開心, 有講有笑, 同時俾呢班過去一直無被看見嘅基層朋友, 重新知道, 原來彈琴唔係要叻或者有錢人先可以接觸, 知道音樂一直都係上主俾我地免費嘅禮物。唔專業嘅好處係咩? 可能就係令到大家個距離感同門檻感拉近。