大角咀終於開啦

今日除左係開張日, 都係我地信仰預苦期嘅第一日, 即係紀念我地老頂準備上十字架前嘅40日。傍晚去到參加敬拜同探班, 見到同工們都得返半條人命, 同工同我講: “你錯過左岩岩淪陷嘅一刻”, 原來唔係第一日生意有幾好, 而係第一日想入會做會員嘅人坐爆左間鋪, 而因為呢區我地係新黎, 所以有好多新面口, 而當中好多仲係抱住好多怨氣, 對社區對政府對自己生命滿有怒氣嘅朋友, 鬧住我地同工咁要支援。而同工一如以往, 用生命值同情緒值硬接。接完一日, 大家自己友食飯, 傾下笑下, 明天再見。

幫左先再Review, 成為MANNA上下一個文化, 唔理你黎到咩情況咩態度, 傾左先食左先, 慢慢再算。願上主使用我們, 都可以係呢區生根。街坊或者附近做野嘅你, 得閒黎食個飯, 支持下我地, 俾下意見。