我地需要大家代禱!

代禱事項 – 時間令到事情有所演變

更新朋友聚會, 由一個唔夠10人嘅晚飯活動, 去到現時5-60人嘅小敬拜, 的確我地唔係幫哂所有人都有完全脫離過去, 但係盼望嘅光跟住時間好明顯係到不斷擴張緊。之前提過我一間餐廳仔, 更生同無家者服務呢Part, 由派飯開始去到有宿舍, 由1間宿舍去到3間, 當中最令我地想有更多配套嘅, 就係工作機會。係有住宿同活動, 教會同社工之後, 過去我地唔同鋪都有俾更新朋友唔同工作位置, 但係都慢慢唔夠位, 我地由2019年4個同工, 到今日140個同工, 大多都係有需要或者想體驗信仰事奉嘅朋友。

但係上主聽禱告, 我地看見社區都令到上主看見我地。黎緊4月有一間公司會免租包水包電咁俾我地負責營業佢地嘅員工食堂, 因為佢地知道我地係食物上邊雖然未係”The Best”, 但係我地都好盡力不斷改善, 所以佢地想令到同事有好食物之外都可以協助我地幫到更多人。感恩, 我地呢到可以創造到更多實習機會俾我地班宿友。

不過, 如果大家認識我地, 都知道我地從來無儲蓄, 我地所有奉獻同餐廳收入都會當月用哂, 所以今次果間公司有咁好嘅Offer, 但係我地都需要解決StartUp果筆裝修同爐具開支。

過去多年, 我地都係按住我地召命上嘅看見同埋上主給予嘅勇氣, 連同大家嘅信任同支持咁過, 令到我地可以看得見就去得到, 因為我地相信, 事工嘅開展唔係因效率或者預算表而定, 而開展與否係我地願唔願意話俾班受惠朋友知道, “上主看得見”。