呢位係觀塘碼頭生活既無家者伯伯, 同工一探就4年, 佢近年因為過去種種, 經常要上庭, 加上毒品令佢身體好差每個月都總會出出入入醫院幾次, 然後出院後就會回歸毒品同四處飄泊既生活。身邊無親人, 其他有血緣嘅都喺內地, 最後MANNA同工電話成為左佢醫院既聯絡人。
星期一去醫院探佢, 見到佢今次入院情況好差, 因為失去自理能力而意志消沉絕望max。過去都有同佢講過下福音, 佢一直都當我地唱歌。直到我地早幾日同另一個更新左嘅觀塘碼頭兄弟去醫院探佢，佢竟然決左志，本身條氣明明好喘仲可以大大聲講願意一生一世將條命交比耶穌。琴日醫務社工打黎, 點知唔係夾岀院野, 而係講佢情況轉差唔係好清醒，問有冇屋企人聯絡電話。可惜我地實在係無, 但我地相信MANAN同工上下就係佢家人。最後喺院牧幫忙協調下我地拉隊去搵佢, 最後係大家見證下, 佢受左灑禮。
佢身體健康之後點發展, 最後出唔出到院, 我地都唔可以100%肯定, 但係灑禮後我地成班圍住佢講返過去咁多年嘅事同人, 好多回憶出哂黎。佢本身幾喜歡煮野俾人食, 由佢覺得今次應該唔會再出到院, 到最後佢會話如果出到想煮咩俾我地食, 我估呢D就係盼望, 因為今一次, 佢出到院的話, 最大轉變係, 有人等佢同有人接佢
