做餐飲係難, 但做獨居長者送飯呢個事工係難加難, 大家唔係做開可能覺得怪, 送個飯上去俾公公婆婆有咩難呢?
難在公公婆婆住嘅地方都唔同, 目前我地一日出緊只係俾長者嘅飯大約幾百個, 除左港島同島外都有要送嘅地區, 安排車手同上門送飯係一個好大嘅ADMIN工程。第二樣難嘅就係公公婆婆們都有唔同需要, 多菜小飯唔食得牛唔食得豆唔可以有汁飯要硬D軟D等等, 幾款飯可以生出幾十個唔同組合, 所以準備工作要由前一日開始, 到準備好飯要可能兩班人集中精神先可以唔出錯。第三係長者好多時都會入醫院, 又或者有其他情況, 令到個量好唔穩定, 經常上落, 令到落單情況隨時煩瑣過普通餐廳叫外賣, 而且都多突發情況, 例如長者無應門又或者發現長者暈左等等。
但我地會唔會做落去? 會, 因為呢個計劃其實真心有意義, 除左唔小機會令到暈係屋企嘅長者可以救得返外, 更成為左一個令佢地無咁孤獨嘅日常活動。
目前我地真係賣一個就蝕一個, 我地收長者$20, 一湯一飯一菜一肉送上門, 而果$20我地係直接俾左幫我地送飯嘅婦女們做水腳, 所以我地好需要大家支持, 因為我地目前無無任何政府資助去行呢件事。
