MANNA係一次屬於大家嘅奇幻旅程

2019年我地岩岩開, 第一年我地用係社福(社關福傳)服務到, 全年開支大約係6萬蚊左右, 2022年7月我地正式申請到成為NGO, 而去到2023年, 短短幾年間, 我地年度社福開支突破左一千萬。我大約用計數機計過, 係一個大約4年1660%嘅增長, 呢個咁大嘅增長如果唔係騙案, 就肯定係神蹟, 係一個屬於大家嘅神蹟。因為好老實, 我地餐飲生意唔係做得叻, 我地最叻果幾個月都係支持到大約一個月10萬左右去社福工作上邊, 所以其他開支係點處理到呢? 就係大家一直嘅信任同奉獻。

神蹟在於大家嘅信任, 因為我地唔係傳統老字號NGO, 都唔係咩國際級機構, 我地只係得個幾年歷史, 仲要無咩大台大大背景, 只係一個好土炮嘅香港人成立, 由小做起嘅NGO。我地目前都無大基金同政府支持, 因為我地由心想保留同受惠人關係嘅深入同彈性, 我地唔想追進度係咁開Case計人頭計服務人數追進度, 所以我地行到今日, 係因為香港人一直支持, 如果你話MANNA係同基層同行緊, 其實都係香港人同MANNA同行緊。

去到今日, 我地成日話唔知可以做到幾時, 唔係是旦講, 而係一個事實, 因為我地一直都好似嗎哪一樣, 日日有供應但係都日日清。我地又唔想都唔會因為錢問題而個別Cut服務, 因為係我地眼中, 全部都係真真實實嘅”關係”。我地唔打算因為支持唔住而出小幾個慈惠飯, 都唔核因為頂唔順而唔再送飯俾長者。所以做下做下, 就到今日呢個神奇嘅1660%奇幻旅程。

上邊幅圖係我地2024年1月嘅社福服務開支, 而我地2023起接近個個月都係咁上下。你見到無Admin Cost唔係因為我地無Admin, 係因為我地餐廳營運到會支持埋我地整個機構嘅Admin Cost, 所以大家嘅奉獻會去哂社福服務到。為左想透明D, 我地會個個月將報表放上我地網站hkmanna.com果到, 大家可以隨時去望下。

而上邊果埋說話, 其實全部都係緩衝我內心尷尬嘅說話, 事實係我想開口搵大家持續支持我地事工, 但又唔知應該點開口。認真我地係唔係突然無資金呢? 唔係嘅, 係真心個個月尾都無哂, 咁今一次為咩會破天荒開口呢? 因為我發現班同工同埋我自己, 之前成日口講就話執左佢算光榮結業, 休息下是旦揸巴士仲舒服, 但其實都係口是心非, 去到2024嘅今日, 我地其實都想好好事奉落去, 我地去到一個地方, 就會見證住果到嘅基層就因為MANNA呢個群體而聚集, 由小朋友到長者, 都好似多左份我地都放唔低嘅關係一樣, 我地仲想睇到班無家者轉變, 我地想陪班小朋友大過, 我地想送飯送到個最後一個長者返天家為止, 等佢唔使擔心地上嘅下一飯。未來土瓜灣又會係一個新地方, 我地預計我地開支都只會持續增加, 所以, 我想邀請大家同我地行多段路。