可以嘅話阻阻你睇哂佢先!
不經不覺MANNA透過餐廳做社關都開始左六年, 由一開始只係一個星期派一次飯, 有個小小糧倉, 到現在月派一萬五千份食物, 又有英文補習, 又有中醫義診, 獨居長者送飯等等, 由4個同工到現在50幾人, 又有社工又有五湖四海嘅朋友, 個個頂住個意義放低出邊份人工, 義工又去到400人, 以上嘅都只係講緊觀塘情況, 深水埗都未真係開始, 所以呢一段真係一個好神奇好神奇嘅旅程。
回想當日事工開始擴展, 都唔係我地計劃好去做咩, 所有都係由探無家者開始, 再動員佢地做義工, 一步步見到長者需要, 訓身回應後遇見埋劏房家庭, 進而認識到一班SEN小朋友。所有群體嘅遇見, 都唔係我地計劃去搵, 而係見到佢地, 就好似天父無迫我地去做, 反而係俾我地自己決定幫定唔幫, 【幫左先再Review】嘅文化, 就係咁樣慢慢出現
其實大家都知餐飲呢兩年都真係好難做, 仲記得我地為深水埗攪差遣禮嘅時候, 中途大家仲收到政府又停晚市嘅消息, 真係嚇一跳, 然後得啖笑。無法, MANNA本來就係回應社會需要, 頂硬上, 開始有人同自己講, 不如CUT緊小小人手啦, 反正生意差左4成有多, 再係咁真係好難頂得順, 你執左又做唔到扶貧, 都要取捨啦。 道理我唔係唔明, 但係CUT人就係我令到個同工無飯開, 我真係做唔出, 你想像唔到佢地出到去會幾難搵到個安全穩定工作環境, 同埋, 大家真係做野耐左熟左, 成日嘈來嘈去突然小左把聲, 真係會唔捨得。有時又會諗, 事工唔係攪咁多應該節省到開支啦, 但係當我地去review事工受惠朋友時, 好多情況都真係慘到絕望, 根本唔可能忍心停個支援。
其實我地成立做餐廳做社關又做團契, 就係希望可以用餐飲自負盈虧而自立, 希望係自立中有多D機動性同自主性, 始終支援有時真係要快同準, 諗得PLAN得受惠人都唔等得, 二來覺得籌到錢先做好似好樣衰, 所以一直都無真係籌過。加上我地過往都真係可以用平時營運嘅錢去出哂同工嘅糧, 所以過往收到嘅奉獻, 同飯券, 都可以話係接近無admin fee咁制, 100%去左受惠人到。而為左確保所有資源都會用返去社關上, 所以我地一直以來都係非牟利機構, 同時申請緊免稅牌。
講到呢到, 我估大家都明, 其實我係想大家諗下會唔會長時間支持我地既社關事工, 我希望可以搵到一班人恆常個個月支援我地$500, 其實我地只需要搵到百幾人就可以更穩定更奔放。我有諗過將大量我地遇到嘅故事同相俾大家望下, 但係又太過嬌情唔係MANNA作風, 所以最後連張相都用左我地第一次落區嘅相, 一張唔專業嘅相, 果日咩事呢, 係天氣突然急降, 我地班左批物資俾無家者, 結果物資遲到, 我就唔夠衫, 要街友幫返我轉頭借野俾我保暖。所以大家真係想持續支援我地, 真係諗清楚先, 我地係好專業地唔專業, 但係呢份唔專業往往成為我地嘅親和力, 成為我地可以建立咁多關係嘅祝福。同時, 有幾樣野都必須講左先：
1. 我地現時係非牟利機構
2. 我地觀塘目前受惠會員會員有過千人, 恆常接觸有500人左右
3. 所以你地嘅支援唔會用來擴展服務, 我地打算深化而唔係擴展
4. 目前我地服務群體有無家者, 劏房家庭, 獨居長者
5. 我地有會計同核數師監察住
6. 我地目標係更新, 復和, 得能力所以所有個案都好漫長
7. 我地係想受惠朋友最後成為可以施予嘅人
其實我地想小額恆常支援, 唔係唔想接受多支援, 而係我地成日有就會用左, 例如上次有奉獻, 我地本來分享俾清潔工就由飯盒變成原隻雞, 70人活動變為150人活動, 我地的確係無咩儲蓄習慣, 因為呢兩年個社會有需要嘅人真係多左好多好多, 我地覺得$$儲埋用途唔大, 呢幾年世界變化大到, 香港都唔知會唔會突然陸沉, 所以資源快D用哂係要用既地方仲好。
最後, 你睇到呢到都好多謝你, 希望你唔好介意我打得咁亂, 如果你願意每月定額$500幫助我地嘅, 或按感動自由奉獻, 我都無以為報, 以身相許又好似攪著你, 所以我地唯有送張全線8折卡俾你作感謝, 同埋上邊果張相外加簽名加祝福過你(雖然相果part係講笑但係你敢要我都敢俾)。可以就share俾你朋友食餐飯都跌左$500嘅朋友啦。
史上最廢總幹事
方達賢LEO致上
#IfYouCare
#500蚊一個月一蚊幫一個家庭集合大家力量
#其實我地真係好任性好不務正業
#但真係好想盡力做落去
#你嘅同行好重要
#中銀同恆生都可以仲有FPS
#查詢66360121
