Manna走入第十年
我地轉Logo啦, MANNA呢幾年經歷左好多大轉變, 由一個地方到有六個地方,由一間餐廳仔去到年開支升到去2300萬嘅慈善機構。要改Logo嘅主因其實無咩特別, 一係因為想個Logo有返中文俾受惠朋友睇到, 二係因為舊Logo仍然講我地係Café, 但係熟識我地嘅朋友都知我地老早就唔係間Café啦, 所以就決定連個Logo都轉鬼埋佢。
其實行左咁耐, 最多朋友關心我地嘅, 就係問我地為咩要做住餐飲去攪扶貧同行, 為咩係一個咁難做嘅環境底下仲要苦苦掙扎, 只做社關服務唔好咩? 而我地新Logo【膳工】兩個字大家都應該估到, 我地仍然會堅持落去。 表面上, 我地係因為所謂召命而固執去營運, 但其實要講都有兩個主要堅持原因, 一係因為當時觀塘再開嘅時候, 我地有一套自己關於愛, 憐憫同埋耐性嘅睇法, 自己知道未必改變到個世界, 所以就想營造一個細嘅角落生態, 同有需要嘅人係一個盡力好似自給自足嘅環境到行一段路, 而由食物開始去到更新, 工作, 事奉, 團契, 再走出社會服務返其他人, 餐廳就成為左一個不可或缺嘅重心, 所以無論我地去到邊, 食物同餐廳都係我地個支柱之一。
第二個原因, 可能有D奇怪, 係我地唔太想做事工只用其他人捐贈奉獻, 或者要因為生存而要去寫funding, 我唔係話Funding唔好, 而係我地都知道唔同Funding或者奉獻者都有佢想幫想做又或者自己認為岩嘅路, 而MANNA好多野都太奇怪, 例如我地成個機構事工, 都無Budget Plan, 睇見需要就做左先, 所有野都係透支Plan, 咁其實對Funder而言又未必接受到。而餐廳, 就提供左一個大家香港人都可以參與到嘅途徑, 就係黎食餐飯, 訂個到會都係奉獻左支持我地, 第一段講, 我地岩岩果個年度開支係2300萬, 而MANNA同工, 其中有好多係我地受惠培訓又或者更新嘅同工, 佢地有份係餐飲工作到回收到接近60%嘅支出。即係話, MANNA可能係香港到最特別嘅慈善機構之一, 我地幫緊去更新或者重新上路嘅受惠同工, 同一時間都幫返MANNA再去幫返佢自己或者其他新朋友, 我地自己人唔再分到高低, 一個家入邊唔同位置但仍然係咁高咁大。
MANNA屬於我地所愛嘅天父爸爸, 令到我地一直可以行一條勇敢而奇怪嘅路, 一條基於召命嘅透支式事工路。 而MANNA嘅社會服務, 其實都同時屬於我地香港人, MANNA今日嘅擴展同多樣性, 呢一種咁高機動快速而無大制肘, 同時混合幾種餐廳信仰同機構嘅文化, 或者真係香港人先接受得到, 同時都係過去你地嘅信任同實際奉獻支持, 我地先可以成為我地, 一個包括埋【你】嘅我地。
香港未來係點我地唔需要個時代同時事評論話俾我地知, 不如, 我地同心一齊重新定義咩係香港人。
